21 лютага на факультэце журналістыкі адбылася літаратурна-музычная імпрэза «Пра мір і Радзіму на матчынай мове», прысвечаная Міжнароднаму дню роднай мовы. У медыятэцы імя Цікоцкага на Кальварыйскай 9 сустрэліся вядомыя паэты і пісьменнікі, дзеячы беларускай культуры, публіцысты і вучоныя-выкладчыкі, студэнты, супрацоўнікі факультэта журналістыкі і фундаментальнай бібліятэкі БДУ.

Спецыяльна запрошанымі гасцямі мерапрыемства былі: журналіст, паэт, Заслужаны дзеяч культуры Рэспублікі Беларусь Навум Якаўлевіч Гальпяровіч; паэт, доктар філалагічных навук, загадчык Цэнтра філасофіі літаратуры і эстэтыкі Інстытута філасофіі НАН Беларусі Валерый Аляксандравіч Максімовіч; кандыдат філалагічных навук, дацэнт кафедры медыялінгвістыкі і рэдагавання Пётр Пятровіч Жаўняровіч. У чытальнай зале бібліятэкі прагучалі вершы на патрыятычную тэматыку ў аўтарскім выкананні.

Асобую частку вечарыны склалі паэтычныя і музычныя выступленні студэнтаў факультэта журналістыкі з Беларусі, Расіі і Кітая.

Ініцыятарам падзеі была кафедра медыялінгвістыкі і рэдагавання факультэта журналістыкі, да якой далучыліся: кафедра літаратурна-мастацкай крытыкі, члены пярвічнай арганізацыі БСЖ факультэта журналістыкі і фундаментальнай бібліятэкі БДУ. Куратарам імпрэзы выступіла дацэнт кафедры медыялінгвістыкі і рэдагавання, кандыдат філалагiчных навук Вольга Аляксандраўна Горбач.

21 лютага Савет стараст факультэта журналістыкі таксама арганiзаваў квэст, які прымеркаваны да свята.

Дзень роднай мовы на факультэце журналістыкі праводзіўся сёлета ў трынаццаты раз. Першы раз атмасфера гэтага свята з'явілася на факультэце ў 2011 годзе. Мiжнародны дзень роднай мовы пачалі адзначаць у 1999 годзе пасля прапановы ЮНЭСКА такім чынам абараняць і захоўваць як мага больш моў свету.